CEBU, Philippines - Duha ka higanteng koponan, ang nine-time champion University of the Visayas (UV) Green Lancers ug ang University of Cebu (UC) Webmasters mosugod na karong adlawa sa ilang pinaksitay sa Game-1 sa ilang "best-of-five" championship series sa 2010 Cebu Schools Athletic Foundation, Inc. (CESAFI) basketball event diha sa Cebu Coliseum.
MGA DUWA KARON
(Cebu Coliseum)
4:30 pm -- CEC vs. SHS-Ateneo (Jrs. finals)
6:00 pm -- UV vs. UC (Srs. finals)
Gituhoan nga alegre sab ang juniors finals tali sa Cebu Eastern College (CEC) Dragons ug sa Sacred Heart School-Ateneo de Cebu (SHS-AdC) Magis Eagles diin ang duha nagtinguha pagkulit og school record sa labing una nilang pag-abante sa finals sa kasaysayan sa CESAFI.
Gipanas na sa Dragons ang ilang angga nga "whipping boys" nga ilang gilukdo sa dugay nang katuigan gikan pa sa panahon sa CAAA, samtang ang the Magis Eagles, ang bugtong team nga midaog batok sa UV Baby Lancers sa duha ka higayon karon nga season, nahimo na sab nga usa ka lehitimong contender gikan sa "great pretender" sa miaging tuig.
Ang UV ug UC parehong nagbitbit og 1-1 nga baraha ning tuiga. Ang Lancers nidaog sa elimination round, 82-79, apan ang Webmasters mibawos sa semifinals, 88-63.
Mao sab ang CEC ug SHS-Ateneo nga nagbitbit og 1-1 nga baraha. Ang Dragons nidaog sa ilang unang engkuwentro niadtong Hulyo 31 sa iskor nga 90-87, apan ang Magis Eagles mitusik ug ilang nasumpo ang dautang tinguha sa CEC pagharos sa semis pinaagi sa pagposte og 84-79 nga kadaugan.
Ang 6-foot-9 center nga si Junemar Fajardo mao gihapon ang mangu sa opensa sa Webmasters ug pahimuslan ang iyang gitas-on aron maghari sa undergoal. Ang presensiya sa kusgan nga forward nga si Edward Pao ug ang daku nga point guard nga si Quinton Brian Heruela ug ace playmaker Kelvin Juliane maoy nakadugang kalig-on sa ilang kampanya.
Mao kini ang ikatulong higayon sa 10 na ka tuig nga CESAFI nga ang UV ug ang UC nag-abot sa finals, apan ang Lancers mao kanunay ang mopatigbabaw.
Unang nag-abot sa finals ang UV ug UC niadtong 2005 ug nasundan sa miaging tuig.
Sa kasaysayan sa CESAFI finals, ang UV nakigtakos kausa batok sa CIT Wildcats atol sa 2001 inaugural season, upat ka higayon batok sa USJ-R Jaguars (2002, 2003, 2004 ug 2008) ug kaduha batok sa USC Warriors (2006 ug 2007).
Ang UV ug UC parehong dagkung unibersidad nga gipanag-iya og mga abogado -- Atty. Eduardo R. Gullas ug Atty. Augusto W. Go ug pareho sab natawo sa bulan sa Oktubre.
Si Atty. Go magsaulog sa iyang adlaw'ng natawhan karong Oktubre 11, samtang si Gullas magsaulog sa iyang adlaw'ng natawhan sa Oktubre 13. Busa kun kinsa man sa duha maoy modaog sa korona, mao kini ilang gasa ngadto sa nahisgutang team owners.
Ang Lancers moduwa nga wala na ang 6-foot-11 center Gregory Slaughter. Magsalig na lang ang Lancers nilang Harold Cincoflores, Eman Calo, Phil Mercader ug John Michael Abad alang sa opensa.
Sa laing bahin, ang Dragons magsalig nilang Nike Montalvo, James Neil Sumayang, Roy Villarias, Benjamin James Zosa ug Johnmar Lou Regidor.
Ang Magis Eagles mosandig sab nilang Adrian Roland Muller, Adven Jess Diputado, Henry Renzal Asilum, Bradley Bacaltos ug Julius Salvador Cadavis. (BANATSPORTS)
=============