Orcollo, Alcano at Reyes umusad

MANILA, Philippines - Sinamahan nina Efren “Bata” Reyes, Dennis “Robocop” Orcollo at Ronato “Volcano” Alcano si Lee Vann “The Slayer” Corteza sa second round matapos manalo sa kani-kanilang knock-out match kontra mga Thai rivals sa 2010 Pattaya 9- Ball Invitational Pool Competition sa Royal Garden Plaza sa Pattaya, Thailand.

Tinalo ni Reyes si Sompol Saetang, 9-1, habang binigo ni Orcollo si Ophas Suwannarat, 9-3, at pinayukod ni Alcano si Somkuan Tianponkrang, 9-5.

Nauna nang nanalo si Corteza kay Kevin Fortt ng Great Britain, 9-1.

Makakalaban ni Corteza si Nitiwat Kanjanasri ng Thailand, umiskor ng 9-5 panalo kay Bhupinder Singh Monga ng India.

Makakatapat naman ni Reyes si Suratep Phoochalam ng Thailand, nanalo sa kababayang si Amnuay Chotipong, 9-3, samantalang makakatagpo ni Orcollo si Chris Melling ng England, tinalo si Chang Yu Long ng Taiwan, 9-4, at makakalaban ni Alcano si Lee Chenman ng Hong Kong, nagpabagsak kay Preecha Bonmueng ng Thailand, 9-2.

Tumipa rin ng tagumpay sina Takashi Uraoka ng Japan, Fu Chi Wei ng Taiwan, Taguchi Kenji ng Japan, Liu Hai Chang ng Taiwan at Tomo Takano ng Japan.