Ebon mibuak og duha ka meet records sa 20th Cebu City Olympics

CEBU, Philippines - Mihinay-hinay na og kulit sa iyang ngan sa esena sa swimming si Kirk Ebon sa University of San Carlos (USC) human gibuak ang duha ka meet records kagahapon sa pagsugod sa 20th Cebu City Olympics diha sa Cebu City Sports Center (CCSC).

Si Ebon milansang og rekord sa 200m ug 400 freestyle, nga iyang nahimo sa labing unang higayon sukad sa iyang pagtaak dinhi sa Sugbu sa miaging tuig.

Ang lumad nga taga-Davao City nga si Ebon mi-oras og dos minutos ug 25.18 segundos sa 200m freestyle, iyang natabonan ang miaging rekord nga 2:33.43 nga nahimo ni Jose Mari Lozano niadtong 2004.

Mihimo sab siya og impresibong performance sa 400m freestyle uban sa oras nga singko minutos ug 7.37 segundos, diin iyang gibuak ang 5:53.44 ni Michael Ichiro sa miaging tuig.

Ang teammate ni Ebon nga si Mel Duran nakasinati sab og maong kadaugan dihang iyang giharian ang 200m backstroke sa tertiary division. Iyang gibuak ang rekord ni Gino Bagano nga 3:31.49.

Ang USC squad nilang Karla Casino, Stephanie Tan, Jennifer Sembrano ug Judenia Brand, mihimo sab og rekord sa collegiate 400m freestyle relay uban sa oras nga 6:29.60 nga igo na kaayo pagpapas sa rekord sa Southwestern University (SWU) nga 7:43.37 sa tuig 2008.

Si Lyh Ann Navarro sa Cebu Eastern College (CEC) mibuak sa kaugalingon niyang rekord sa miaging tuig sa 400m freestyle uban sa oras nga 5:34.58. Iya usab nga gidominar ang 200m individual medley (2:58.11) ug ikaduha sa 50m backstroke.