ALA Boys mosulod kalibotan sa showbiz

CEBU, Philippines - Sama nila ni boxing superstars Manny Pacquiao, Nonito Donaire Jr. ug Olympian 'Onyok' Velasco, tulo ka ALA Boys ang giatngang mosulod sa kalibotan sa showbiz.

Si WBO minimumweight king Donnie 'Ahas' Nietes, boxing prospects Rey 'Boom Boom' Bautista ug AJ 'Bazooka' Banal, mao ang tulo ka ALA boxers, milagda og kontrata ubos sa Viva Entertainment nga maoy modumala sa ilang karera gawas sa boxing ring.

Sila si ALA Promotions president Michael Aldeguer ug Viva Entertainment CEO Vic del Rosario mipirma sa kontrata alang sa ilang partnership aron i-promote ang tulo ka boksidor, atol sa press conference didto sa Cebu Grand Hotel kagahapon.

Si Del Rosario misaad nga iyang pasidlakon ang bitoon sa ALA boxers pinaagi sa paghatag kanila og product endorsement ug mismo paghimo kanila isip artista sa umaabot.

Ang amahan sa Viva Entertainment nga si Del Rosario, kinsa mao ang responsable sa grabeng kasikat karon nila ni Sharon Cuneta, Sarah Geronimo ug Anne Curtis, nakahukom nga kuhaon ang ALA Boys kay sa   mga Manila athletes tungod usab sa kabaga sa fan-base sa tulo ka boksidor dinhi sa Visayas ug Mindanao.

Sa iyang bahin, si Aldeguer mihangop sa maong lakang tungod kay mahinungdanon kini aron mahatagan og exposure ang ALA Boys nga makatabang kanila alang sa mga umaabot nilang sangka.

Usa sa nagtukmod ni Aldeguer aron himuon ang maong lakang mao ang nakita niyang kakulang sa pagtagad nga gihatag sa Pinoy boxing community ngadto ni Nietes, kinsa usa sa duha ka nahabiling world champions sa nasud, sunod ni Manny Pacquiao.

Si Nietes, kinsa lab-as pa gikan sa impresibong unanimous decision nga kadaugan batok ni Mario Rodriguez niadtong Agosto 14, nangandam karon alang sa iyang ikalimang title defense sa Pebrero sunod tuig batok sa wala pa mailhing kontra.  (BANATSPORTS)