USC, CCS nidominar sa cheer dance tilt

CEBU, Philippines - Unang nakakuha'g puntos ang Univesity of San Carlos (USC)-Basic Education sa Unit 8 ug City Central School (CCS) sa Unit 5 human nila gidominar ang cheer dance competition sa ilang tagsa-tagsa ka dibisyon atol sa opening sa 20th Cebu City Olympics kagahapon diha sa Cebu City Sports Center (CCSC).

Human sa ilang kadaugan, ang Unit 8 ug Unit 5 otomatik nga napundo og 10 puntos matag usa. 

Ang Unit 8 maoy nanghawod sa secondary division, gisundan sa Abellana National School sa Unit 9 ug sa Southwestern University sa Unit 5.

Sa elementary division, ang Unit 5 naghari batok sa Mambaling Elementary School sa Unit 3 ug San Nicolas Elementary School sa Unit 4 nga mi-okupar sa ikaduha ug ikatulo nga mga dapit.

Laing 10 puntos ang napuno sa Unit 5 dihang ang ilang elementary ug secondary delegation nakadawat og award isip Best in Parade and Saludo. Ang Unit 2 ug Unit 7 miangkon sa ikaduha ug ikatulo.

Ang senior student sa University of San Jose-Recoletos nga si Luigi Gomez, maoy napili isip "Miss Cebu City Olympics 2010."

Si Gomez, 15-anyos nga may gitas-on nga 5'7" nahimong resident model sa AD Models Association sud na sa usa ka tuig. Siya unya ang morepresentar sa Cebu City sa Central Visayas Regional Athletic Association (CVIRAA) sunod bulan didto sa Dumaguete City.

Si Gomez, usa usab sa mga delegates sa Visayas Region sa 2nd National Milo Little Olympics karong Oktubre 14-17 didto sa Cagayan de Oro City.

Ang runners-up ni Gomez mao sila si Christel Joy Lagdameo sa USC-Bed ug Shennen Friel Codilla sa University of Southern Philippines Foundation (USPF).

Si Wendy May Valiente sa Lyceum   of Cebu maoy miangkon sa elementary division title, samtang sila si Lyhlet Fiel Ruela sa USJ-R ug Queen Prittz Tabada sa Basak Community School maoy miangkon sa ikaduha ug ikatulo.

Si Christene Mae Sanguenza sa USPF mao sab ang nidaog sa tertiary crown batok nilang Jhoy Paulyn Santos sa Cebu Eastern College ug Patricia Ann Argawan sa Cebu Normal University. (BANATSPORTS)