CEBU, Philippines - Nahan-ay na ang tanan alang sa pagpahigayon sa 2nd Gullas Run nga mosikad karong Oktubre 10 diha sa Talisay City Hall grounds.
Mas gipangandaman karon sa lokal nga kagamhanan sa Talisay ang mas bagang duot pa unya sa mga runners nga mohugop sa kadalanan.
Niining tuiga, gipatas-an ang rota sa dagan gikan sa 10K ngadto sa 12K.
"Gikan sa 10K last year, naka-decide mi nga himuon og 15K, apan molapas na mi sa boundary sa Talisay ug Cebu City, maong amo lang gihimong 12K,” matud pa ni Talisay City Councilor Rodi Cabigas atol sa launching kagahapon didto sa Talisay City Hall.
Gawas sa 12K, may lumba sab sa 5K open, 5K media, 5K Inter-school, 3K open, 3K boys and girls ug 1K senior citizen.
Mokabat sa P100,000 nga ganting salapi ug mga tropeyo ang giandam alang sa mga mananaog sa matag dibisyon.
May special awards sab ang itunol ngadto sa biggest delegation, youngest and oldest runners ug "Most Bibo" runners.
Matud ni Cabigas nga tipik sa salapi nga ilang matigom sa maong lumba ilang ihatag ngadto sa mga scholars sa Talisay City College.
Niadtong interesadong mosalmot, ang registration fee nagkantidad og P200, libre na ang singlet ug race number.
Mamahimo magparehistro sa Talisay City Sports Commission (TCSC) ug diha sa Cebu City Sports Center.
Ang deadline hangtod lang sa Oktubre 7. – BANAT NEWS