SHS Batch '85 "Night Race" sa Oct. 16

CEBU, Philippines - Sa labing unang higayon, ang Sacred Heart School for Boys batch 1985 mopasiugda og "Night Race" karong Oktubre 16 sa alas-6 sa gabii diha sa Cebu Doctors' University (CDU) sa north reclamation area, siyudad sa Mandaue.

Magsilbe usab kini nga second leg sa ilang 2010 Eagle Run. Sama sa first leg, ang lumba gibahin sa tulo ka kategoriya --10K, 5K ug 3K sa men's ug women's division.

Aron pagseguro nga luwas ang mga partisipante, dugang mga marshals ang ipakatap sa tibuok rota. Dugang pa niini, ang Dakay Construction and Development Corporation mobutang og mga halogen lights alang sa maong lumba.

Ang mga runners hatagan og "glow-in-the-dark" bracelet uban ang colors corresponding sa ilang tagsa-tagsa ka dibisyon alang sa pag-ila.

Ang notadong Running Eye Doctor ug usa sab sa mga haligi sa maong lumba nga si Dr. Yong Larrazabal, miingon nga limitado ug kutob ra sa 2,000 registrants ang ilang dawaton aron seguro nga luwas ang mga runners.

Aduna kini registration fee nga P300 ug ang registration sugdan ugma diha sa Nike Athletic Club sa Banilad Town Center, Dessert Factory sa Ayala Terraces ug Center for Sight nga nahimutang diha sa Cebu Doctors' Hospital.

Ang top three finishers sa matag dibisyon makadawat og ganting salapi ug medalya.

Atol sa awarding ceremony adunay raffle nga pagahimuon lakip na ang "Leaf Slide" chair nga gibanabanang nagkantidad og $800.

Alang sa dugang mga detalye, mahimong motawag sa 256-2020.   – BANAT NEWS

Show comments