CEBU, Philippines - Gipangdemolis sa Cansaga ug Lamac ang tagsa-tagsa nila ka mga kaatbang sa Sangguniang Kabataan (SK) division sa Consolacion Mayor’s Cup 2010 Fiesta Basketball League didto sa Consolacion Sports Complex.
Usa ka nagdilaab nga scoring rally ang giduslitan sa Cansaga sa first half aron dauban ang Tolotolo, 78-49, samtang mipauwan og puntos ang Lamac sa katapusang kuwarter aron lumsan ang Casili, 71-44.
Ang Cansaga igo lang nilabaw og tres puntos sa first quarter sa iskor nga 16-13, apan milusad kini og 21-5 run sa sunod hugna aron pagposte og 37-18 sa halftime ug sukad niadto wala na kini molingi pa hangtod nga naangkon ang 29 puntos nga kadaugan.
Sa laing bahin, gikontrolar sa Lamac ang tibuok duwa ug wala gyud nila patilawa og labaw ang Casili. Naangkon sa Lamac ang double digit nga labaw human nila tak-opi ang third period sa iskor nga 43-33, giusban nila kini og 28-11 run nga maoy mikandado sa ilang 27 puntos nga kadaugan. (BANATSPORTS)