Lancers vs. Cobras

CEBU, Philippines - Ang nine-time champion University of the Visayas (UV) Green Lancers mohimo na sab og lakang alang sa ilang ika-10 nga pag-abante sa finals dihang ilang ikasangka ang ilang higpit nga karibal Southwestern University (SWU) Cobras karong adlawa sa pagsugod sa Cebu Schools Athletic Foundation, Inc. (CESAFI) basketball semifinals single round robin format diha sa Cebu Coliseum.

Sa dili pa ang UV-SWU showdown, ang secondary division topseed Cebu Eastern College (CEC) Dragons, nagtinguha mobangon human sa ilang 76-81 nga kapildihan ngadto sa UV Baby Lancers atol sa elimination round aron posible silang magkaduol na sa ilang gidamgo nga labing unang finals sa kasaysayan sa ilang tunghaan.

Gawas lang tingali og adunay milagrong pagahimuon ang Cobras karon aron kontrolahon ang kabangis sa Lancers, daw seguradong ilubong sila pag-usab susama sa resulta sa eliminasyon diin gilubong sila sa iskor nga 57-75.

Ang Lancers mitapos sa elimination bitbit ang 7-0 nga baraha, apan wala nay kuwenta ang maong baraha kay "back-to-zero" man ang upat ka semifinalists. 

Ang fourth-ranked Cobras daw pabiling hubog gikan niadtong dakung pilde sa Lancers tungod kay naglisod sila'g pukan sa Don Bosco Technology Center (DBTC) Greywolves sa pagtapos sa elimination, 67-63.

Kun ang Lancers magmadaugon, kinahanglan lang silang modaog bisan asa sa University of Cebu (UC) Webmasters ug sa University of San Carlos (USC) Warriors aron seguradong moabante sa finals.

Sa ilang na-abtan karon, daw sa wala na magkinahanglan ang Lancers sa ilang 6-foot-11   Gregory Slaughter tungod kay bisan wala siya moduwa, wala makasugat dakung suliran.

Sila si Ralf Olivares, Harold Cincoflores, Eman Calo ug Phil Mercader maoy gitahasan sa opensa batok sa Cobras nga naglaum nilang Rene Pacquiao, Arrd Evan Diano, Clefford Maguate ug Chris Litorja.

Sa laing bahin, ang Dragons mosalig kanilang Nike Montalvo, James Sumayang, Benjamin James Zosa, Roy Villarias ug Johnmar Lou Regidor.

Ang Baby Lancers daku sab og pagsalig nilang Gerald Legarde, Alwin Aguirre, Vincent Mendoza ug Michael Smith nga maoy posibleng mohimo sa mga puntos.  (BANATSPORTS)