CEBU, Philippines – Milatay pa sa alambri ang Police Beat sa wala pa nila tumbaha ang Sportswriters Association of Cebu (SAC) 62-57 aron maangkon ang kampiyonato sa 2010 Press Freedom basketball tournament kagahapon diha sa UV gym.
Miarangkada dayon ang Police Beat sa pagsugod sa duwa human sa ilang 25-10 scoring run sa first period sa pagpangulo nila ni Robert Sabequil ug Jovel Obiso.
Gawas sa ilang fastbreak plays, giharian usab sa Police Beat ang rebounding department nga maoy miinat sa ilang labaw ngadto sa 15 puntos, 35-30 sa nahabiling 2:01 paingon ngadto sa third period.
Bisan pa sa maong labaw, wala gihapon moisa sa ilang puti nga bandera ang SAC ug maisugon kining misukol pinaagi sa hugot nga depensa ug sa sunod-sunod nga tira nila ni Jonas Paneiro ug Manny Villaruel aron pahakan ang labaw ngadto sa dos puntos, 43-45 sa sayong bahin sa third period.
Nailog sa SAC ang labaw sa katapusang singko minutos sa duwa human sa duha ka free throws ni Panerio, 58-55, apan dali kining nabawi sa Police Beat pinaagi sa three-point play ni Edgar Escalante.
May purohan pa unta nga makuha sa SAC ang daog, apan mikagar ang 3-point shot nilang Jun Migallen ug Edri Aznar.
Sa sayo pa, ang City Hall Beat cagers mipukan sa Capitol Beat sa iskor nga 74-61 aron pag-angkon sa ikatulong dapit.
Ang Press Freedom Cup nga usa sa highlights sa Press Freedom Week, gisuportahan sa Coca-Cola Philippines. (BANATSPORTS)