Bacolod mo-host sa Summit Fight Night

CEBU, Philippines - Puno sa aksiyon ang mahitabo sa panagharong ni RP No. 1 light flyweight contender Jerson Mancio ug ni comebacking   Rollen del Castillo sa Summit Fight Night karong gabii didto sa Pahanukoy Gym sa Bacolod City.

Ang duha ka boksidor nga pulos mga agresibo, seguradong mopauwan sa ilang mga mahait nga kumo.

Laraw ni Mancio nga mamawi human makatagamtam sa una niyang pilde niadtong miaging tuig batok sa reigning RP 108 lbs. champion Marlou Topales.

Sa iyang bahin, si Del Castillo maninguha sab nga modaog aron buhion ang nagkalubad niyang karera sa boksing.

Lain pang atngan sa maong boxing event, mao ang professional debut sa manghod ni welterweight prospect Mark Jason Melligen nga si Mark John Rey, kinsa makigbinukbukay batok ni Bonbon Gino sa Butuan City ubos sa lightweight division.

Usa ka national amateur boxing team member si Mark John Rey, apan nihukom nga mobiya sa amateur aron sundon ang lakang sa iyang maguwang sa pro.

Laing beteranong boksidor nga mosuway pagbuhi sa iyang karera mao si Dondon Sultan. Iyang harungon si Dondon Llagas sa usa ka heavyweight showdown.

Ang maong boxing card nga libre sa tanan gipasiugdahan sa Summit Natural Drinking Water ug ALA Boxing Promotions. Ang hinugpong puwersa maoy responsable sa pagsulbong sa karera nila ni Jason Pagara, Bon Jovi Canillas ug OPBF flyweight champion Rocky Fuentes. – BANAT NEWS