6th GUV Cup buksan na karon

CEBU, Philippines - Dili na gyud kapugngan ug sugdan na gyud ang gikahinaman nga 6th Governor Gwen Garcia Unity Volleyball (GUV) Cup for men and women karong alas-8 sa buntag diha sa Mandaue City Cultural and Sports Complex.

Si Gov. Garcia, kinsa maoy utok ning labing daku ug bongga nga volleyball event sa rehiyon, nahimuot og maayo sa partisipasyon sa nagkalain-laing dakbayan ug lungsod sa probinsiya sa Sugbu.

Niining edisyona sa GUV Cup, ang matag koponan mahimong makakuha og labing menos duha ka reinforcements aron mas mabulokon ang kompetisyon.

Molamas sa kalihukan karong adlawa mao ang gubat sa mga kampiyon nga ulohan og "Who will reign supreme, the cities or the municipalities?"

Kining makasaysayanong gubat naglatid sa mga kampiyon sa siyudad ug lungsod sa men ug women's division.

Sa women's bracket, magsangka ang Catmon ug Talisay sa ala-1 sa hapon, sundan sa duwa sa men's division tali sa Liloan ug Mandaue.

Tulo ka commissioners sa Philippine Volleyball Federation (PVF) ang motambong sa grand opening.

Si GUV Cup executive director Nona Catipay miingon nga mao na kini ang dagan sa GUV Cup sunod tuig diin magsangka ang mga kampiyon sa siyudad ug municipal clusters sa opener. – BANAT NEWS