Violet, Ryle Trucking midaog sa Sunday Club cagefest

CEBU, Philippines - Naanghelan pa ang Violet team human masuyop sa ring ang 3-pointer ni Alan Sepe sa himalatyong oras sa final period aron pagbuntog sa Yellow, 93-90 sa Phase 3 Camella Homes Sunday Club basketball tournament didto sa Villas Magallanes gym sa Lapu-Lapu City.

Kanunay'ng naggukod ang   Violet sa unang-duha ka kuwarter diin ang Yellow sa kombinasyon nilang Leo Almacin, Centes Brañanola ug D. Dela Pieza milubong kanila'g 11 puntos sa halftime, 53-42.

Nakahimo hinuon sa pagkamang ang Violet sa third quarter luyo sa naglagiting nga kainit sa mga kamot nila ni Alan Sepe ug Roilan Sumilang aron pahakan ang labaw ngadto na lang sa kuwatro puntos paingon sa final period.

Sila si Sepe ug Sumilang padayong mipahungaw sa ilang kainit hangtod nga nailog ang labaw nga nakapaginhawa og lawom sa Violet.

Nahimong kulbahinam ang duwa dihang nakatabla ang Yellow, 90-all human masud ang mahinungdanong itsa ni Pleños sa nahabiling 10 segundos nga mohatod unta sa duwa ngadto sa overtime, apan si Sepe miposa sa iyang marka-bahala nga 3-point buzzer beating nga nagtuboy sa Violet ngadto sa kadaugan.

Si Sepe mirehistro sa iyang game-high 35 puntos aron pangulohan ang Violet, samtang si Sumilang miariya og 17 puntos.

Ang naparot nga Yellow gipangulohan ni Almacin pinaagi sa iyang 17 puntos, gisundan ni Brañanola nga adunay 15 puntos. Si D. Dela Pieza mitikdol og 14 puntos ug si Diongzon miambit og 12 puntos.

Sa laing duwa, ang Ryle Trucking yano kaayong mihakot og daog pinaagi sa paglubong sa Rollway Freight Forwarders sa iskor nga 109-85.

Puntos Matag Usa

Unang duwa:

VIOLET (93) - Sepe 35, Sumilang 17, Geraldez 14, Balberona 13, Palad 6, Maratas 2, Villapez 2, Rodriguez 2

YELLOW (90) - Almacin 17, Brañanola 15, Dela Pieza 14, Diongson 12, Vega 10, Pleños 8, Tongol 4, Braza 2

Ikaduhang duwa:

RYLE TRUCKING (109) - Oyanib 26, Brañanola 24, Sanchez 22, Dela Pieza 17, Catampatan 11, Palad 4, Delan 2, Palad 2

ROLLWAY (85) - Diñola 21, Andrino 21, Regala 19, Padilla 8, Omega 8, Abel 5, Llaguna 3. – BANAT NEWS