Meting miluwas sa Bulacao batok sa Lawaan I

MANILA, Philippines - Ang foot-back ni Ezzrel Meting sa nahabiling 2.1 segundos maoy misalbar sa Bulacao gikan sa mga kamot sa Lawaan I, 90-89, sa Seniors division sa Talisay City Mayor's Cup basketball tournament didto sa Talisay Sports Complex.

Gilubong ang Bulacao og 16 puntos sa halftime, 33-49, apan ang tandem nilang Meting ug Brederik Brigole mipahungaw sa ilang kainit sa final period aron ilogon ang daog gikan sa Lawaan I.

Ang Bulacao mikitkit sa labaw ngadto na lang sa tres puntos, 56-59 sa nahabiling 2:33 sa third period human sa duha ka free throw ni Brigole. Apan nanginit og balik ang Lawaan I sa fourth quarter aron inaton ang labaw ngadto sa otso puntos, 78-70.

Apan didto ra taman ang maayo nilang labok kay ang Bulacao milusad og 11-6 rally aron tablahon ang iskor, 88-all.

Nilabaw og usa ka punto ang Lawaan I human sa usa ka free-throw ni Federico Nino sa nahabiling kuwatro segundos, apan wala nila mabantayi ang katapusang hirit ni Meting nga mipunit sa bola gikan sa rebound dayong itsa sa iyang winning-shot.

Sa main game, sa seniors division, ang Tanke mipabuto og mga bomba aron buntogon ang Dumlog sa iskor nga 73-64.  (BANATSPORTS)