1st Talisay City M'bike Challenge sa Okt. 2-3

CEBU, Philippines - Mga riders gikan sa Talisay ug mga silingang dapit ang gilaumang maglumba sa ipahigayong 1st Talisay City Vice Mayor Allan Bucao Mountainbike challenge karong Oktubre 2 ug 3 didto sa Talisay City Hall grounds.

Gibuak kini ngadto sa duha ka kategoriya -- downhill event ug cross-country category.

Sa unang adlaw mao ang downhill event nga anha manukad sa Ilang-ilang sa Brgy. Lagtang, diin ang mga riders motaak sa batuhon nga rota dapit sa Metro Cebu Water District (MCWD) reservoir. Dayon ang downhill category gibahin sa tulo ka dibisyon -- pro, intermediate ug beginners.

Sa sunod adlaw, magtigi na ang cross-country riders nga gibahin og upat ka kategoriya --open, junior-beginners, veterans ug executives.

Ganting salapi ug medalya ang madawat sa mga top finishers. Ang registration fee nagkantidad og P200. Niadtong mga interesadong mosalmot mahimong motawag sa Talisay City Sports Commission sa numero 2722755. (BANATSPORTS)