USC, SWU nagsawo

CEBU, Philippines - Nakalahutay ang University of San Carlos (USC) Lady Warriors sa lima ka sets nga pinaksitay batok sa University of Southern Philippines Foundation (USPF) ug nagpabiling walay pilde sa ilang lima ka duwa sa women's division sa Cebu Schools Athletic Foundation Inc. (CESAFI) volleyball tournament niadtong Domingo diha sa Aznar Coliseum.

Ang USC ni coach Norvie Labuga midaog sa unang-duha ka sets, 25-20 ug 25-21 ubos sa mga paningkamot nilang Akemi Aono, Jerymie Montalvo, Suzette Panis, Niña Irish Cortes, Mangie Villaflores ug Chona Gesulga.

Apan ang USPF nakarekober sa third set kortesiya nilang Erika Camille Verano, Apple Eve Sarum, Dianne Navaja, Amore Pepito ug Jovi Abil.

Ang Lady Panther malampusong mibuntog sa Lady Warriors, 25-15. Ila sab nga giangkon ang fourth set, 26-24 aron ihatod ang duwa ngadto sa rubbermatch.

Sa deciding set, ang teamwork ug determinasyon sa USC maoy gihimo nilang gabayan aron tapuson ang makutas nga duwa, 15-10.

Ang USC mihipos sa ikalima nilang sunod-sunod nga daog batok sa University of the Visayas (UV), 25-21, 25-20, 25-15.

Gumikan niini, ang USC nakig-uban sa reigning champion Southwestern University (SWU) ni coach Jordan Paca sa kinatumyang dapit sa managsama nilang 5-0 win-loss records.

Ang SWU mikulit sa ilang ikalimang daog human gipilde ang University of Cebu (UC), 25-14, 25-7, 26-24.

Sa laing duwa, ang University of San Jose-Recoletos (USJ-R) ni Hall of Famer coach Grace Antigua siguro na sa semifinals human makalingkawas batok sa Cebu Doctors' University (CDU), 26-28, 23-25, 25-13, 20-15, 15-5 ug sa UV, 30-28, 25-9, 22-25, 25-14.

Midaog sab ang USPF pinaagi sa pagdemolis sa UC sa straight sets, 25-15, 25-11, 25-11.  (BANATSPORTS)