Cebu mogamit og "Sprint Race Timer"

CEBU, Philippines - Masentro na usab ang Sugbu dili lang sa tibuok Pilipinas, kun dili sa Asia isip unang mogamit sa labing modernong matang sa "timing chips"   sa mga dagkung lumba sa nasud.

 Ang maong timing system nga gikan pa sa Estados Unidos gitawag og "Sprint Race Timer" nga planong gamiton sa    local organizers sa running, triathlon, cycling ug car racing sa mas ubos nga presyo.

Atol sa formal launching sa maong kahimanan kagahapon didto sa Laguna Garden Café, sila si John Pages ug Meyrick Jacalan sa Cebu Executive Runners Club (CERC) mibutyag nga usa sa rason sa ilang pagbubo og puhonan sa maong timing system mao ang mahal nga rate didto sa Manila.

Si Pages, ang presidente sa Sportswriters Association of Cebu (SAC), nagkanayon nga ang CERC pa ang labing unang grupo nga mogamit sa Sprint Race Timer nga mas moderno pa sa timing system nga gigamit didto sa Japan ug Korea. 

Gawas sa tukma ug kasaligan nga resulta nga mapagawas sa maong timing chip, gaan kini ug waterproof pa.

 “Others can update results in the next two hours, ours, it can be done as soon as the one crosses the finish line,” matud   ni Jacalan.

Bisan og sa Oktubre pa mapagawas ang maong system, pipila na ka mga race organizers sa Sugbu ang mipakita og interes nga mosuway og gamit sa Sprint Race Timer. – BANAT NEWS