CEBU, Philippines - Paningkamotan sa men's defending champion University of San Jose-Recoletos (USJ-R) nga moposte'g 3-0 record aron mahatagan og dakung paglaum ang ilang title retention sa Cebu Schools Athletic Foundation Inc. (CESAFI) volleyball tournament karong adlawa diha sa Aznar Coliseum.
Ang USJ-R ni Cebu Hall of Famer coach Grace Antigua nga nangandoy og "grandslam" makigsangka batok sa Cebu Doctors' University (CDU) sa alas-8 sa buntag.
Ang reigning champion maglaum sa ilang team captain Leoniel Sanchez, CHED National Games MVP ug Best Blocker Jesriel Pino, Kevin Casia, James Lawas ug Jayvelle Rojas.
Lain pang lig-ong title contender University of Southern Philippines (USPF) moharong sa Cebu Institute of Technology-University (CIT-U), sundan sa engkuwentro tali sa University of San Carlos (USC) ug sa University of Cebu (UC).
Sa hapon, naglatid kini sa mga duwa sa women's division nga pag-unhan sa USPF batok sa UC, sundan sa USC batok sa University of the Visayas (UV) ug USJ-R batok sa CDU. – BANAT NEWS