CEBU, Philippines - Sa labing unang higayon, ang United Architects of the Philippines (UAP) mopahigayon og "Get Up and Go Green Run" karong Oktubre 24 diha sa The Terraces sa Ayala Center-Cebu.
Ang presidente sa UAP nga si JR Decatoria miingon nga kini ang labing una nilang pagsulod sa running scene human sa pipila nila ka sportsfests nga gipasiugdahan.
Ang lumba magsilbeng tampo sa mga arkitekto ngadto sa komunidad pinaagi sa pag-promote og green architecture, usa ka matang sa arketiktora nga naghatag og bili sa kalikopan.
Gawas pa niini, ang lumba nga gibahin sa tulo ka kategoriya -- 12K, 6K ug 4K, magsilbe usab nga fund-raising activity alang sa Gawad Kalinga.
Gisugdan na ang registration ug mahimong magpalista sa Runner sa Ayala, Casa Ilongga sa Robinson’s Place-Cebu, Adidas sa SM ug Philippine Sports Commission-VII office diha sa Cebu City Sports Center.
Ang registration fee nagkantidad og P250 alang sa 4K ug 6K, samtang P300 alang sa 12K. – BANAT NEWS