SSC, AdU spikers unahan sa Game 1
MANILA, Philippines - Matapos ang tatlong rounds, anim na koponan na ang umuwing sawi habang dalawa na lamang ang nalalabing nakatayo at maglalaban para sa pinakaaasam na titulo.
Sisimulan na ng Adamson University at San Sebastian College-Recoletos ang kanilang sagupaan para sa titulo sa Game One ng best-of-three series ng ikalawang conference ng Shakey’s V-League Season 7 ngayong araw sa The Arena sa San Juan.
Ipinoste ng Lady Falcons at Lady Stags ang kanilang kauna-unahang paghaharap sa titular showdown ng ligang iniisponsoran ng Shakey’s Pizza matapos nilang walisin ang kani-kanilang semis series noong Linggo.
Sa kanilang pagtuntong sa Finals, itinala ng San Marcelino-based spikers ang kanilang ikatlong finals appearance, ang una ay noong sa unang conference ng fifth season na kung saan naiuwi nila ang kanilang nag-iisang titulo laban sa Ateneo at ang ikalawa naman ay noong ikalawang conference ng sixth season na kung saan nabigo sila laban sa University of Sto. Tomas.
Ang natatanging titulo ng Stags ay nagmula noong ikalawang conference ng fifth season matapos nilang padapain ang Tigresses.
Sa curtain raiser naman, sisimulan rin ng Far Eastern U at Lyceum ang kanilang best-of-three series para sa third place trophy sa alas-2 ng hapon.
- Latest
- Trending
