Kanhi BAP president mipanaw na

CEBU, Philippines - Kanhi Basketball Association of the Philippines (BAP) president Quintellano Z. Literal nga gitawag sa iyang mga higala nga "Tiny" mipanaw na sa edad nga 77-anyos.

Ang nagbangotan niyang pamilya naglakip sa iyang asawa nga si Febes Dalman Literal, unom ka mga anak nga sila Arlene, Vincent, Maita, Roy, Maan ug Paul.

Si Literal nagsilbe isip presidente sa BAP gikan sa Enero   2001 hangtod sa 2005 ug gipulihan siya ni kanhi senador Jose D. Lina tungod sa suliran sa panglawas.

Si Lina maoy presidente dihang nahimong kontrobersiyal ang BAP. Ang BAP mihangyo ngadto sa Philippine Olympic Committee nga tangtangon ang BAP isip sakop sa POC nga mao sab ang hinungdan nga nasuspenso kini sa FIBA-Asia secretariat.

Usa ka kanhi Ateneo Blue Eagle, kinsa nakahatag og dakung kontribusyon sa ilang varsity team, si Literal gipasidunggan sa Ateneo de Manila University Alumni Association president Ramon O. Cojuangco Jr. isip sakop sa Ateneo Hall of Fame niadtong Disyembre 2005.

Siya maoy nangu sa Eagles ngadto sa ilang 1953 NCAA championships. Nahimo sab siyang national player kaniadto.

Si Literal nahimugso niadtong Abril 13, 1933 sa Dipolog City, Zamboanga del Norte.

Siya sab maoy presidente dihang nakig-alayon ang BAP ug mipirma’g memorandum of agreement (MOA) tali sa Department of Interior and Local Government (DILG) nga kanhi gipangulohan ni Sen. Lina niadtong Hunyo sa tuig 2003 aron mahimong BAP ug DILG isip katimbang alang sa pagpalambo sa basketball dinhi sa nasud.

Niadtong 2002, si Literal sab maoy nangu sa Philippine sports delegation sa 17th FIBA World Congress didto sa Indianapolis, Indiana, USA. - BANAT NEWS