CEBU, Philippines - Mipadangat og mensahe ang reigning women's champion Southwestern University (SWU) nga seryoso sila sa ilang kampanya pagdepensa sa ilang korona dihang gipilde ang karibal nila sa miaging tuig University of Southern Philippines Foundation (USPF) sud sa straight sets sa Cebu Schools Athletic Foundation Inc. (CESAFI) volleyball tournament niadtong Sabado diha sa Aznar Coliseum.
Luyo sa trayanggulo nilang Danika Gendrauli, Lorie Mae Layno ug sa rookie niining si Fritzie Aliway uban sa ilang reinforcement Princess Ann Pido, ang SWU ni coach Jordan Paca milampurnas sa USPF sa unang duha ka sets, 25-14, 15-16 sa wala pa sila mokulit og 25-23 sa third set aron hingpit nga maangkon ang kadaugan.
Sa miaging adlaw, ang SWU mikulit sab og laing tulo ka sets nga kadaugan batok sa University of San Jose-Recoletos, 25-12, 25-23, 25-18.
Ang kadaugan nagduso sa SWU ngadto sa kinatumyang dapit sa liderato dala ang 4-0 nga baraha.
Sa laing bahin, ang host-University of San Carlos (USC), daw naibtag tunok human makalingkawas sa makutas nga duwa nga miabot og lima ka sets, 25-20, 25-27, 15-25, 25-18, 15-10.
Responsable sa kadaugan sa USC mao sila si Jerymie Montalvo, Suzette Panis, Niña Irish Cortes, Akemi Aono, Mangie Villaflores ug Chona Gesulga.
Nasumpayan ang daog sa USC human nila gipilde ang Cebu Doctors' University (CDU) sa four sets, 25-15, 25-21, 23-25, 25-21.
Sa lain pang duwa, ang CDU mibuntog sa University of the Visayas (UV), 28-26, 25-19, 25-20. Dali hinuon nga nakabangon ang UV pinaagi sa pagpilde sa University of Cebu (UC), 25-23, 28-26, 25-19.