Delos Santos, Carolino midominar sa DSOS 10k Run

CEBU, Philippines - Wa gyud magpalupig ang reyna sa local running scene nga si Mary Grace Delos Santos human niya gidepensaan ang iyang trono sa 10k women’s run, samtang migawas nga mananaug men’s class ang runner-up sa miaging MILO Marathon nga si Joebert Carolino sa nagmalampusong 2010 DSOS 10k Run kagahapon diha sa Cebu City Sports Center, ning syudad.

Ang MILO Marathon GenSan leg qualifier nga si Delos Santos maoy nag-unang milabang sa finishline sa 10k women’s division sa oras nga 36:46.00, gisundan sa iyang karibal og MILO Marathon Cebu leg champion Mary Joy Tabal kinsa mitapos sa lumba sa oras nga 39:16.33. Si Madelyn Carter maoy mipwesto sa ikatulo sa oras nga 39:47.81, samtang sila si Jojielyn Pepito (41:15.89) ug Mereeis Ramirez (43:56.83) maoy migawas nga fourth ug fifth placer.

Sa iyang bahin, taliwala sa hugot nga kompetisyon sa men’s category, nagmadaugon gyud si Joebert Carolino sa oras nga 33:34.27, batok sa iyang mga runner-ups nga sila si Arnold Unabia (33:36.04) ug Elmer Bartolo (33:48.45). Ang MILO Marathon king nga si Adonis Singson nalagput usab sa ikalima sa oras nga 35:00.00, nagsunod sa fourthplacer nga si Jordan Bacong (33:55.60).

Sa Masters A, nangharus si Allan Polinar, gisundan ni Abayan Teodorico sa ikaduha ug Jessie Mesa sa ikatulong dapit. Naghari usab ang managsuong sila si Ruth ug Elberto Banzon kinsa maoy kampiyon sa Masters B ug C. Si Elberto mipilde nila ni Tomas Nunez ug Rusty Vergara sa Masters B, samtang si Ruth maoy naglawig batok sa iyang mga runner-ups nga sila si Diomedes Sigue ug Roberto Labra.

Si Marcos Pelare ang unang miabot sa finishline alang sa Masters D, nagsunod sila si Adolfo Camello Sr. ug Lorneo Taneo isip second ug third placer.

Ang maong lumba nga gihalad alang sa ika-132 nga anibersariyo sa adlawng natawhan sa giilang “Grand Oldman of Cebu” Don Sergio Osmeña Sr., gipasiugdahan sa Cebu City Sports Commission ug sa kagamhanan sa syudad sa Sugbu. (BANATSPORTS)