CEBU, Philippines - Ang nine-time champion University of the Visayas (UV) Green Lancers milusad og 10-0 run ug wala na molingi pa aron pagposte og 70-60 nga kadaugan batok sa University of Southern Philippines Foundation (USPF) Panthers ug aron usab pag-abante sa semifinals sa 10th Cebu Schools Athletic Foundation Inc. (CESAFI) basketball tournament niadtong Huwebes sa gabii diha sa Cebu Coliseum.
Gikan sa sikit nga iskor, 35-33 sa halftime , gisugdan dayon sa Lancers ang sunod-sunod nilang 10 puntos human napatabla ni Lawrence Miguel Maraño sa Panthers ang iskor, 35-all sa katapusang higayon sa oras nga 9:23 sa third period.
Dihang mihana na og panginit ang Panthers, dali usab kining gipawong sa Lancers diin sayon kaayong mitubag sa opensa si Ralf Olivares aron mosukli og puntos uban nilang Jerome Silva, Adrian Lao ug Phil Mercader.
Si Olivares maoy nangu sa Lancers pinaagi sa iyang 14 puntos, si Lao midugang og 13 puntos ug si Silva mitampo og 10 puntos aron ipahimutang ang Lancers ngadto sa semifinals.
Sila si Mercader ug Harold Cincoflores maayo sab nga nakadala sa ilang papel isip mga guwardiya aron himuong sayon ang opensa sa ilang mga teammates nga maka-puwesto og maayo alang sa maayo sab nga tirada.
Si Maraño mao sab ang topscorer sa USPF uban ang iyang 16 puntos.
Puntos Matag Usa
UV (70) - Olivares 14, Lao 13, Silva 10, Cincoflores 9, Mercader 7, Saycon 6, Abad 5, Avillanoza 4, Calo 2
USPF (60) - Maraño 16, Rivera 15, Dajalos 10, Sedurifa 5, Bardillas 4, Durano 3, Tinoy 2, Avila 2, Ferraren 2, Linao 1. – BANAT NEWS