Tabal midaog sa Naga Charter Day Run

CEBU, Philippines - Pipila lang ka oras human sa iyang malampusong pagsakmit sa women’s title sa 34th Milo National Marathon-Cebu leg, si Mary Joy Tabal mikutlo na usab og laing kampiyonato human niya gidominar ang VAL 2020 Naga Charter Day Run niadtong Domingo sa hapon didto sa Naga.

Wala mipakita’g kaluya si Tabal ug maoy mipatigbabaw batok ni Joeyry Lee sa women’s 5K division uban sa oras nga 21 minutos ug 40.77 segundos. Si Lee mi-oras og 22:35.89 aron pagpahiluna sa ikaduhang dapit, samtang si Christy Sevilleno-Turo mi-okupar sa ikatulo sa oras nga 23:35.89.

Ang men’s 21K champion nga si Adonis Singson napunta sa ikatulo sa men’s 10K nga giharian ni Elmer Bartolo, gisundan ni Ian Bernido.

Sa laing bahin, si Mary Grace delos Santos maoy miangkon sa korona sa 10K run. Gitapos ni delos Santos ang dagan sa oras    nga 39:09.82.

Sa men’s 5K run, si Jorry Ycong mitapos sa lumba sa oras nga 17:40.98 alang sa kampiyonato, gisundan ni Philip Dueñas (17:51.21) ug Jordan Bacong (17:47.45) alang sa ikaduha ug ikatulo nga luna.

Ang The Freeman marketing manager nga si Janet Montenegro, maoy misakmit sa korona sa women’s media 5K, samtang si Bayani Alvarez sa ABS-CBN mao ang hari sa men’s division. – BANAT NEWS