Pecandela, Litigators, 5-0 na IBP cagefest
CEBU, Philippines - Padayong gisaw-an sa Pecandela ug Litigators ang liderato dihang mihaw-as na sab kini og laing daog batok sa tagsa-tagsa nilang kaatbang sa 5th Lawyer's League 2010 Mayor's Cup basketball tournament diha sa Capitol Parish gym sa dalan Escario, ning siyudad.
Ang Pecandela mi-iskor og 62-50 nga kadaugan batok sa Young Lawyer's Association of Cebu (YLAC), samtang ang Litigators nakaipsot batok sa Paneros, 70-67 sa usa ka come-from-behind nga kadaugan.
Ang duha ka teams parehong nagbitbit og 5-0 nga baraha.
Sa laing mga duwa, ang Mt. Zion mikulit sa ikaduha nilang daog batok sa Bros 'N Law , 73-70 alang sa ilang 2-3 nga baraha, samtang ang defending champion Super Idols midaog sab batok sa Iron Eagles, 55-52 alang sa ilang 3-2 nga baraha.
Si Sam Malazarte maoy bugtong player sa Pecandela sa iyang 14 puntos aron pangulohan ang iyang koponan. Ang YLAC gipangulohan ni Van Ligutan, kinsa mi-iskor og 10 puntos.
Ang lay-up ni Ting Ordeniza sa katapusang 50 segundos maoy naghatag og labaw sa Paneros, 67-66, apan dali kining gitubag ni Lito Ortiz pinaagi sa iyang undergoal stab sa nahabiling 24 segundos aron pagposte og 68-67 nga abante ug napun-an kini sa duha ka free throws ni Edward Bauzon sa katapusang kuwatro segundos maoy miselyado sa kadaugan.
Sila si Eugene Sumampong ug Richard Bauzon maoy nangu sa opensa sa Litigators sa ilang 19 ug 15 puntos matag usa, samtang si Rowell Juban maoy nangu sa Paneros sa iya sab nga 19 puntos. (BANAT)
- Latest
- Trending
