CEBU, Philippines - Ang 21 anyos nga si Mary Joy Tabal wala magtuo nga siya maoy mahimong kampiyon sa 21k women’s division atol sa Cebu Leg sa 34th National Milo Marathon uban sa top finisher sa men’s division nga si Adonis Singson kagahapon sa buntag didto sa Cebu City Sports Center.
Si Tabal nga lumad sa Pit-os Talamban ug 4th year Commerce student sa Southwestern University, midaog sa titulo batok sa defending female champion nga si Madelyn Carter. Si Tabal milabang sa finish line sa oras nga 1:28.44 ug si Carter may 1:31.30. Silang duha maoy morepresentar sa Sugbo sa National race karong Disyembre didto sa kaulohan.Si Emily Rosas maoy third placer sa oras nga 1:52.56.
”Mao ni ang una nakong pagdagan sa 21k, last year midagan rako sa 5k” matud pa ni Tabal. “Daku gyud og natabang sa akong preparasyon ang akong pag-apil sa mga local runs matag Domingo”.
Sa iyang bahin, gikan sa 3rd place sa miaging tuig, nakuha ni Singson ang iyang damgo nga mopresentar sa Sugbu sa National race dihang siya maoy mikampiyon sa men’s open sa oras nga 1:15.15, gisundan sa laing national qualifier nga si Joebert Carolino sa oras nga 1:15 39 ug coach sa Cebu’s Running Queen Mary Grace Delos Santos nga si Sherwin Managuil sa oras nga 1:17.10.
Sa 10k run, si Jordan Bacong maoy nanghawud sa oras nga 34:21, gisundan ni Reprinel Banzon sa oras nga 35:16 ug Robert Daang sa oras nga 37:11 isip second ug third placer. Si Christy Tutor usab ang kampiyon sa women’s class sa oras nga 46:55 uban sa iyang mga runner-ups nga sila si Gladys May Sumile sa oras nga 54:37 ug Celestina Lim sa oras nga 55:13.
Ang top three finisher sa 5k men’s mao sila si Michael Estrera (15:19), Carlo Malazarte (15:33) ug Meljun Duterte (15:35), samtang sa women’s sila si Sheena Gacayan (19:09), Clarisse Diongson (19:49) ug Mary Joy Loberanes (20:06).
Wa usab magpauwahi ang mga bata sa 3k 7-12 Age group, dihang midaog sila si Aldrian Saranillo (9:37) ug si Crizel Diongson (10:54) sa boys ug girls division. (BANAT)