USJ-R gisubha'g daog

CEBU, Philippines - Gisubhan og daog ang defending men's champion University of San Jose-Recoletos (USJ-R) apan miagi pa kini og upat ka set una nila mapilde ang University of Cebu (UC) pagsugod sa Cebu Schools Athletic Foundation Inc. (CESAFI) volleyball event kagahapon diha sa Aznar Coliseum.

Ang USJ-R ni Cebu Sports Hall of Famer coach Grace Antigua impresibo kaayo sa pagsugod dihang ilang giangkon ang unang duha ka sets, 25-11, 25-18 kortesiya ni CHED National Games MVP ug best blocker Jesriel Pino uban nilang Ken Bhoyd Abunda, Loujei Tipgos, Kevin Casia, ilang bag-ong team captain, Leoniel Sanchez ug sa bag-ong setter Jayvelle Rojas.

Apan ang USJ-R mikompiyansa sa third set hinungdan nga mibawos ang UC pinaagi sa 25-22 luyo sa mga paningkamot nilang Louie Espina, Juve Marapo, Mamerto Tañola, Jeffrey Catacutan ug Reynante Reyes.

Human masurprisa sa ilang kapildihan, ang USJ-R nagmabinantayon na sa fourth set ug mi-iskor og 25-11 nga kadaugan.   (BANAT NEWS)