23,000 runners moapil sa 34th Milo Marathon

CEBU, Philippines - Dakung lumba ang mahitabo karong Domingo sa pagsikad sa Cebu leg sa 34th Milo Marathon diha sa Cebu City Sports Center (CCSC).Kapin sa 23,000 ka runners ang modagan sa labing daku ug karaang running event sa nasud.

Ang Cebu leg nga ikaduha sa Manila nga adunay labing daghan nga partisipante gibahin gihapon sa upat ka kategoriya 3K Kiddie Run, 5K Fun Run, 10K Run ug ang 21K half marathon elimination race.

Ang 21K magsilbeng pasaporte alang sa Sugbuanong runners nga modagan sa 42.195k National Milo race.

Si Madelyn Carter, kinsa mao ang nidominar sa miaging National Milo elimination, maningkamot nga malabwan pa ang iyang best time nga 1:31.18, samtang ang defending men’s champion nga si Mendel Lopez, kinsa atua karon didto sa kaulohan wala pay segurong makasalmot.

Gawas ni Carter, mga Cebuano runners nga kompirmadong modagan sa 21K qualifiers kini naglakip nila ni Jennifer Belocura, Lorhiz Echavez, Eugene Delposo, Mary Joy Tabal ug Adonis Singson.

Sa press conference kagahapon didto sa CCSC conference room, si Milo sports executive Andrew Neri nagkanayon nga daghang kausaban ang ilang gipatuman sama sa paggamit og nindot nga panapton gikan sa Thailand alang sa singlet, pagbutang og age-group qualifying round ug paggamit og timing chips sa 21K run.

Sa iyang bahin si Milo consumers manager Steph Sy, mihatag usab sa iyang dakung pasalamat sa suporta sa mga Sugbunaon sa Milo Marathon nga anaa na karon sa ilang ika-34 ka tuig.

Agi’g pasalamat, ang Milo mihatag og 400 ka paresan sa mga bag-ong running shoes ngadto sa tinun-an sa elementarya gikan sa Tejero Elementary School. – BANAT NEWS