Krusyal nga duwa sa UV, SHS-AdC

CEBU, Philippines - Krusyal nga duwa ang atubangon karon sa University of the Visayas (UV) Baby Lancers sa ilang pakigsangka batok sa Sacred Heart School-Ateneo de Cebu (SHS-AdC) Magis Eagles sa main game sa secondary triplebill sa 10th Cebu Schools Athletic Foundation, Inc. (CESAFI) diha sa Cebu Coliseum.

Sa kasamtangan, ang Baby Lancers temporaryong nahimutang sa ikaduhang puwesto uban ang 4-1 win-loss record ug kinahanglan nga ilang pildihon ang Magis Eagles aron motapos isip no. 1 inig tapos sa classification round.

Dili sab buot sa Baby Lancers nga hamokon sila pag-usab susama sa ilang nasinati sa miaging tuig nga igo lang silang mi-iskor og 89-82 nga kadaugan batok sa Magis Eagles.

 Ang Baby Lancers aduna pay tulo ka duwa nga nahabilin, apan sila maoy paborito batok sa USPF Baby Panthers ug sa USJ-R Baby Jaguars.

 Ang CEC Dragons mao karon ang nag-una sa liderato sa ilang 6-1 nga baraha, apan kun ang Baby Lancers motapos sa elimination round bitbit ang 7-1 nga baraha, sila mao ang mahimong no. 1 pinaagi sa simple tie   kay midaog mao sila sa Dragons, 81-76 sa ilang sangka niadtong Agosto 6.

Sila si Vincent Mendoza, Gerald Legarde ug Alwyn Aguirre maoy pipila lang sa sinaligan sa Baby Lancers, samtang ang Magis Eagles (4-2) maghangad nilang Adven Jess Diputado, Bradley Bacaltos ug Henry Renzal Asilum uban sa ilang big men nga sila si Adrian Muller, Julius Salvador Cadavis ug Ray Daniel Abbu.

 Sa laing sangka sa juniors division, ang USPF Baby Panthers magpas-an og bug-at nga bagahi sa ilang pakigsangka batok sa UC Junior Webmasters, samtang ang CIT-U Wildkittens makigbugno batok sa USJ-R Baby Jaguars. – BANAT NEWS