Cebu Niños vs. MisOr Meteors sa TOP finals

CEBU, Philippines - Nagmilagro na sab ang M. Lhuillier Kwarta Padala-Cebu Niños diin ilang gipaluhod ang Treston Laguna-Stallions sa Game-2, 89-79 aron makakuha og lingkoranan sa finals sa Tournament of the Philippines (TOP) kagabii diha sa Cebu Coliseum.

Ang Niños ug Misamis Oriental Meteors mag-ilog sa labing unang korona sa TOP sa ilang "best-of-three" finals karong Septiyembre 7 diin ang Cebu nakabaton og homecourt advantage.

Lab-as pa sa dominante nilang kadaugan sa Game-1, ang Cebu Niños ni coach Raul 'Yayoy' Alcoseba mipahamtang na sab og laing kapildihan sa Laguna Stallions.

Mipakita sa ilang kaisog ang Laguna pagsugod sa duwa, apan wala kini mosalir tungod kay gibiyaan dayon sila og nuybe puntos sa Niños sa nahabiling 1:54 sa first period.

Si Stephen Padilla, kinsa mao ang leading scorer sa Niños, nag-wild usab sa first half diin miburak siya og 11 puntos lakip na ang buzzer-beating triple nga nakapainat og maayo sa ilang labaw ngadto sa 19 puntos sa halftime, 53-34. Si Padilla mipabuto og 22 puntos, gisundan nilang Ariel Mepaña ug Ian Saladaga nga adunay 15 puntos matag usa.

Gawas sa nagtusak-tusak nilang opensa, grabe usab nga nakapatuman og solidong depensa ang Cebu Niños hinungdan nga ang Laguna nakahimo og siyam ka turnovers sa second half. 

Ang natagak nga Laguna gipangulohan sa ilang shooting guard Glenn Bolocon, kinsa miposa og 25 puntos, samtang ang forward nga si Marlon Legaspi midugang og 14 puntos.  – BANAT NEWS