USJ-R, UC parehong midaog

CEBU, Philippines - Parehong milkulit og daog ang University of San Jose- Recoletos (USJ-R) Jaguars ug ang University of Cebu (UC) Webmasters niadtong Lunes sa gabii sa nagpadayong 10th Cebu Schools Athletic Foundation, Inc. (CESAFI) diha sa Cebu Coliseum.

Ang Jaguars mipasulod og lima ka triples sa fourth period aron mo-iskor og 80-66 nga kadaugan batok sa University of Southern Philippines-Foundation (USP-F) Panthers, samtang ang Webmasters nagkinahanglan pang Junemar Fajardo nga mokayod og maayo aron modaog batok sa Cebu Institute of Technology-University (CIT-U) Wildcats, 83-75.

Sa mga duwa sa secondary, ang Sacred Heart School-Ateneo de Cebu (SHS-AdC) Magis Eagles naka-ipsot batok sa University of San Carlos (USC) Baby Warriors sa iskor nga 85-82, samtang ang mangtas nga Cebu Eastern College (CEC) Dragons milamoy sa USJ-R Baby Jaguars sa iskor nga 72-58.

Makakurat ug makapaisa sa kilay ang matang sa duwa nga gipakita sa Wildcats sa pagpangulo ni Chester Curso dihang ilang gipauwanan og puntos ang Webmasters gikan sa first period hangtod na nga nahuman ang halftime sa iskor nga 39-34.

Si Curso puwerteng buynasa sa maong duwa ug mitakod kini ngadto sa iyang kaubanan, kinsa nagpatuyang sab og pamupo og puntos.

Ang kursonadang si Curso   yano kaayong milusot-lusot ni Fajardo ginamit ang mga hangtime moves ug kinawatkawat nga reverse lay-ups. Dihang gi-depensahan na siya’g maayo, kalit lang sab nabugnaw ang kainit sa Wildcats.

Si Fajardo adunay 19 puntos, samtang sila si Edward Pao, Robinson Mohammad ug Gerald Ampoon parehong mi-iskor og double figures alang sa UC, kinsa mitapos sa ikaduha sa elimination round uban ang 6-1 win-loss record.

Si Curso mirehistro og game-high 33 puntos aron pangulohan ang Wildcats.

Sa sayo pa, si Kurt Amores maoy nangulo sa Jaguars pinaagi sa paglansang og 14 puntos, samtang si Jun Lapiz midugang og 13 puntos lakip na niini ang tulo ka triples. Gitapos nila ang classification round bitbit ang 2-5 nga baraha.

Si Fritz Dajalos mihipos og 21 puntos alang sa Panthers, kinsa maoy naghupot sa labing ngil-ad nga rekord sa 10 ka tuig nga CESAFI.

Ang Panthers ni coach Raul Latonio Sr. wala gyud makatilaw og daog sa pito nila ka duwa.

PUNTOS MATAG USA

Unang duwa:

USJ-R (80) - Amores 14, Lapiz 13, Dela Pena 10, Suliman 9, Capillar 8, Abing 5, Bibera 4, Munez 4, Senining 3, Bucayan 3, Nudalo 2, Tabaloc 2

USP-F (66) - Dajalos 21, Bardilas 12, Marano 11, Avila 7, Linao 6, Rivera 5, D. Ferraren 2, J. Ferraren 1

Ikaduhang duwa:

UC (83) - Fajardo 19, Pao 15, Mohammad 13, Ampoon 12, Juliane 7, Heruela 4, Bercede 3, Magallanes 2, Cabrera 2, Cueva 2

CIT-U (75) - Curso 33, Ipang 11, Canete 11, Dimco 9, Dela Cerna 9, Taboada 1, Sanchez 1    (BANAT)