Pason nanghawod sa Shell chessfest

CEBU, Philippines - Giharos ni Allan Pason ang iyang katapusang upat ka duwa aron solong maghari sa kiddies division sa Shell National Youth Active Chess Championship-Central Visayas leg sa miaging adlaw diha sa University of San Carlos-North Campus gym, ning siyudad.

Si Pason, ang pambato sa Pajo National High, mikudlit og 8.5 puntos aron paghari sa 14-and-under division.

Si Tristan Ibaoc sa Corpus Christi Grade School, misilhig sab sa iyang katapusang upat ka mga duwa aron pagtapos sa kompetisyon uban ang otso puntos.

Nagtabla si Ibaoc ug si Jazzrelle Villarin sa University of Cebu, apan gidaog kini pinaagi sa tie-break.

Gipruybahan sab ni Villarin nga mahimong surprise package sa sixth leg sa walo ka hugna nationwide circuit nga gipaluyohan sa Pilipinas Shell, dihang nakabawi siya human sa unom ka hugna nga kapildihan ngadto ni Gilig dihang miposte kini'g mga daog batok ni Laurence Minoza, Vic Derotas ug Troy Ibaoc. Gitapos niya ang duwa uban ang otso puntos.

Sa laing bahin, si Christian Fiel sa University of San Carlos mao sab ang mipatigbabaw sa juniors division ning maong kompetisyon nga gipaluyohan sab sa National Chess Federation of the Philippines, Shell V-Power, Shellane, Shell Helix ug McDonald's.

Si Fiel mipilde ni Keith Ibaoc sa sixth round, dayon nagtabla uban ni James Torres sa wala pa niya pildiha si Niño Bautista aron pagtapos sa eight-round tournament uban ang 7.5 puntos.

Si Torres sa University of San Jose-Recoletos mihipos og siyete puntos paghuman sa torneyo.

Lain pang mga awardees sa duha ka adlaw nga kompetisyon nga gitambongan ni Elmer Yap, Pilipinas Shell Mandaue terminal manager, Shell's sustainable development manager Ronald Suarez ug Cebu City Councilor ug Vice Chairman of Committee on Youth and Sports Alvin Dizon mao si top female player Ma Cecille Lumapac sa Montaneza National High (6 pts./juniors), 3-year-old Jane Ashly Parantar (youngest player), Top 8-year-old Jeremy Pepito sa University of San Carlos (6.6 pts.), Drayn Torres sa Abellana National High School (sportsmanship) ug Abellana National High School ug Canduman National High School (schools most represented). (BANATSPORTS)