CEBU, Philippines - Andam na ang lungsod sa Naga alang sa labing una nilang 10K Run -- ang "Val2020 Naga 10K Charter Day Run" karong Domingo didto sa Naga Baywalk.
"Kining lumba magsilbe nga follow-up run sa nagmalampusong Val2020 Fun Run niadtong Disyembre," matud pa ni Naga LGU Administrator Engr. Arthur Villamor atol sa final press conference didto sa Sunburst-Gaisano Tabunok.
Ang lumba magsilbe usab sa mga highlights sa kasaulogan sa 3rd Charter Day Celebration sa Naga ug ingon man sa adlaw'ng natawhan ni Naga Mayor Val Chiong.
Sa laing bahin, ang race directors nga sila si Hazel Busa ug Joel Baring sa Sports and Fitness Enthusiasts (SAFE), mipasabot nga ang maong lumba dili makasumpaki sa ipahigayong Cebu Leg sa Milo Marathon kay sa hapon pa man kini ipahigayon. Magsilbe hinuon kini nga recovery run alang sa mga runners, kinsa moapil sa Milo Marathon sayo sa buntag sunod adlaw.
Gawas sa 10K run, may lumba sab alang sa 5K, 5K media ug 3K fun run.
Ganting salapi ug mga medalya ang nagpaabot alang sa mga mananaog. Ang mokampiyon sa 10K open mobulsa og P3,000, samtang sa 5K open ug 5K media modaog og P2,000. Ang kampiyon sa 3K fun run makadawat og P1,000.
Ang registration magpadayon hangtod sa adlaw sa lumba. Aduna kini registration fee nga P200 ug mahimong magparehistro diha sa Senior Citizens Office sa Naga ug sa Vicky Marketing diha sa Tabunok.
Alang sa dugang mga kasayoran, mahimo mo-kontak sa numero 489-89-89 o 487-41-76 ug pangitaa si Joel Matusa. (BANATSPORTS)