CEBU, Philippines - Adunay 22 ka teams ang kumpirmadong mosalmot sa tinuig nga Association of Regional Executives in National Agencies (ARENA-7) basketball tournament sugod karong Miyerkules, Septiyembre 1 didto sa Camp Lapulapu gym sa Lahug, ning dakbayan.
Ang mobukas sa maong torneyo mao ang gikahinamang sangka tali sa defending champion Land Transportation Office (LTO) batok sa Bureau of Internal Revenue (BIR) nga gipangulohan sa ilang captain ball nga si Yoli Meso.
Ang torneyo karong tuiga gipasiugdahan sa BIR isip lead agency ubos ni regional director Jun Santiago ug ni ex-USC Warrior James Engel Sievert aron paghatag og kalingawan, physical fitness ug pakighigalaay tali sa mga executives ug mga rank and file employees sa ARENA-7.
Ang 22 ka teams bahinon ngadto sa duha ka brackets— ang bracket A pagalangkuban sa mga executives diin gitugotan sa pagduwa ang mga kanhi varsities ug commercial players samtang ang bracket B eksklusibo lang sa mga rank and file employees.
Si Cebu City Mayor Michael Rama motambong sa opening ceremony diin gikatakda nga mohatag siya’g inspirational message.
Duna sa’y pilion nga Miss ARENA-7 2010 sa dili pa pormal nga buksan ang sangka tali sa LTO ug BIR.
Ang laing mga teams nga misalmot mao ang Department of energy, Philippine Ports Authority, Philhealth Insurance, Bureau of Fire Protection, Mactan Cebu International Airport Authority, Civil Service Commission, Bureau of Immigration, Bureau of Jail Management and Penology, Department of Agriculture, BIR ug LTO. (BANAT)