Cebu mo-host PVF referees congress

CEBU, Philippines - Sa labing unang higayon, ang Queen City of the South mo-host sa biennial Philippine Volleyball Federation (PVF) Referees Congress karong Septiyembre 17-19 diha sa Cebu International Convention Center.

Lima ka international referees ang moduma sa extensive exams atol sa tulo ka adlaw nga congress alang niadtong mahimong national referees, nga gihimo sa abag sa GUV Cup ug sa Cebu Volleyball Association (CEVA).

Si Nona Catipay, ang PVR-RC vice president for Eastern and Central Visayas, miingon nga nagpaabot sila alang ning maong congress nga ipahigayon dinhi sa Sugbu nga gihatag kanila atol sa PVF-RC didto sa Tacloban niadtong 2007.

Sa iyang pagtudlo isip vice president, nadesisyonan nga ang Cebu maoy sunod nga mo-host. Natayming sab nga ang maong matang sa paugnat sa kusog misulbong og maayo dinhi ilabi na sa pagpahigayon sa tinuig nga Governor Gwen Garcia Unity Volleyball (GUV) Cup.

Ang mga opisyales sa GUV Cup ug CEVA ug mga miyembro miadto sa Tacloban niadtong 2007 alang sa PVF-RC, nga kausa lang mahitabo sa matag duha ka tuig.

Ang congress modapit og national referees candidates gikan sa Dumaguete, Siquijor ug Bohol ug uban mga kandidato, kinsa nangandoy nga moapil. (BANAT NEWS)