Lancers vs. Jaguars

CEBU, Philippines - Ang solo leader ug nine-time champion University of the Visayas (UV) Green Lancers nagtinguha sa ilang ika-unom nga sunod-sunod nga daog, apan dili nila makauban ang point guard nilang si Eman Calo sa ilang pakigsangka batok sa University of San Jose-Recoletos (USJ-R) Jaguars karong gabii sa 10th Cebu Schools Athletic Foundation, Inc. (CESAFI) diha sa Cebu Coliseum.

Si Calo, kinsa mosilbe og usa ka duwa nga suspensiyon human siya ma-ejected sa ilang 82-79 nga kadaugan batok sa University of Cebu (UC) Webmasters niadtong Domingo, dili   makaduwa karon batok sa Jaguars apan dili gihapon kini mahimong babag kay anaa man sila si Harold Cincoflores ug John Michael Abad nga maoy motimon sa backcourt.

Si Calo mi-iskor og 15 puntos sa ilang pagpukan sa Webmasters ug nahimong instrumento dihang ang Lancers naka-eskapo uban ang tres puntos nga kadaugan human   usiki ang ilang 19 puntos nga bentaha.

Ang Jaguars nga nagtinguha sa ilang ikaduhang daog nagbaton og dili maayong sinugdanan sa 10-anyos na nga CESAFI.

Ang Lancers mosandig karon ni Ralf Olivares ug nagkinahanglan siya sa abag nilang Jerome Silva ug Harlow Chad Villanil, Adrian Lao, Andrew Avillanoza ug Rene Jun Saycon.

Sa higayon modaog sila    karon, ang 5-0 nga Lancers   posibleng mosilhig sa eliminasyon karong Domingo dihang ilang sukdon ang abilidad sa Southwestern University (SWU) Cobras.

Ang 1-4 nga Jaguars mosandig kang Kurt Amores, apan tungod kay wala sila'y laing mga higante nga makasuporta kaniya, nanghinaut sila nga mangigo   sila si Christian Senining, Edwin Bibera, Jun Lapiz ug Jaymar dela Pena sa gawas ug sa guwardiya nilang si Jason Nudalo, Gian Carlo Albarillo ug Benjamin Capillar alang sa depensa.

Sa laing bahin, ang University of San Carlos (USC) Baby Warriors tinguha sab nga mopalambo sa ilang baraha sa dihang ilang sangkaon ang way daog nga Don Bosco Technology Center (DBTC) Junior Greywolves sa secondary match.

Kagahapon unta ang regular schedule sa CESAFI, apan gi-uswag karong adlawa tungod kay ang coliseum dili magamit kagahapon.  – BANAT NEWS