CEBU, Philippines - Gipatapsingan sa AMBL Enterprises ang ilang kaatbang nga J.M.A. pinaagi sa pag-iskor og 90-89 nga kadaugan sa Barangay Association of Ramos (BAR) Fiesta Cup Inter-Color basketball tournament diha sa Benjamin Solon Memorial Gym sa Brgy. Cogon-Ramos, ning siyudad.
Ang J.M.A. miabante og sayes puntos sa halftime luyo sa mga paningkamot nilang Julius Gastador ug Richie Tecson, apan ang AMBL nanginit sa third period aron pagposte og 12 puntos nga bentaha, 76-64.
Mibawos og rally ang J.M.A. aron makasikit ug makuha ang labaw 89-88 sa daginutong segundos sa duwa.
Sa katapusang play, si Ronald Libre sa AMBL nakalangkat og krusyal kaayong offensive rebound ug dayong pasa sa bola ngadto ni Robert Abasolo, kinsa milansang og buzzer-beating undergoal stab alang sa kadaugan.
Si Abasolo maoy nangu sa AMBL pinaagi sa iyang 20 puntos, samtang sila si Lito Navarro, Dindo Sausa ug Fritz Sullano, nakahimo sab og double figures.
Si Gastador maoy topscorer sa J.M.A. uban ang 22 puntos, gisundan ni Tecson sa iyang 17 puntos.