P150,000 giandam sa Lapu-Lapu Fiesta Cup

CEBU, Philippines - Mokabat ngadto sa P150,000 ang giandam nga ganti alang sa Lapu-Lapu City Fiesta Basketball League nga gikatakdang sugdan karong Septiyembre 25 diha sa Lapulapu basketball court.

Gihapnig kini ngadto sa tulo ka bahin -- Seniors, Open ug Inter-company divisions. Ang Seniors bukas lamang ngadto sa mga players sa Lapu-Lapu, ang Open abli sa tanan ug ang Inter-company alang lang sa Lapu-Lapu based company ug ang tanang players kinahanglan nga empleyado sa kompaniya nga iyang   duwaan.

Naka-unique ning maong liga kay gi-promote kini isip drug free league. Ang team mahimong moduso og protesta batok sa mga players nga ilang gitahapan nga migamit og drugs samtang niduwa.

Sa miaging tuig, adunay 70 ka teams ang nisalmot ug gilauman sa mga organizers nga mosaka pa ang mga partisipante ang mosalmot karon.

Tanan preliminary games anha duwaon sa Lapulapu basketball court ug ang tanang playoff games karong Nobiyembre anha na himuon sa bag-ong nahuman nga Hoops Dome, ang proyekto ni kanhi mayor ug karon Congressman Arturo Radaza.

Ang Lapu-Lapu City Basketball League gidumala ni councilor Harry Radaza sukad pa niadtong 2001. Ang liga naglatid sab og all-star game, 3-point contest ug slam dunk contest.

Giawhag ang tanan sa pagsalmot o pagtan-aw sa mga duwa. Aduna kini admission fee nga P10 aron makatan-aw sa mga duwa.

Matud pa ni Councilor Radaza nga ang liga nagkaugalingon ug wala kini maghangad og tabang sa kagamhanan sa siyudad.