AMBL gisubhan og daog sa BAR

CEBU, Philippines - Yano kaayong gimakmak sa AMBL ni Allan Lim ang Elite Tuesday Club ubos sa ilang captain ball nga si Hembler Mendoza sa iskor, 120-98 aron subhan og makabungog nga kadaogan atol sa pagbukas sa tinuig nga Basketball Association of Ramos (BAR) Fiesta Cup 2010 basketball tournament didto sa Benjamin Solon Memorial Gym sa barangay Cogon, Ramos ning dakbayan.

Nagpakita og katakos ang Tuesday Club kinsa sayong nakaabante sa iskor, 31-22 sa pagpangulo nilang kanhi SWU Cobra Cesar Ortega ug kanhi CCC Executive (karon UC Webmasters) Rocky Bacalso kinsa nagbanos-banos og pamuntos.

Apan wala magdugay, hinay-hinay sab nga nanginit ang AMBL pagsugod sa second period diin sila mibawos og 26-18 nga rally pinangulohan ni ex-UV Lancer Rene Toring aron makasikit ngadto sa 48-49 atol sa halftime.

Migamit dayon og hugot nga depensa ang AMBL atol sa third period nga gipasiugdahan sa beteranong point guard nga si Lito Navarro inabagan ni Lim aron inaton ang ilang labaw pinaagi sa 38-20 scoring ug maka-poste og dakung labaw, 86-69 pagsugod sa final period.

Misamot pa gyud pagburot ang labaw sa AMBL didto sa fourth quarter ug milabaw og 22 puntos diin ang tanang 12 ka players sa team pulos gyud naka-maot sa opensa aron mokulit og daug.

Ang kanhi commercial player nga si Milfred Sampelo maoy nangu sa AMBL pinaagi sa iyang 28 puntos ug miamot sab og dako sila si Toring, Robert Abasolo ug power forward Argiel Magan kinsa pulos miposa og 14 puntos matag usa.

Si Lim midugang og 12 puntos ug si Ope Abellana may 11 puntos lang sa AMBL.

Sila si Bacalso ug Ortega maoy nangu sa Elite Tuesday Club sa ilang 20 ug 15 puntos, matag usa samtang si Nesty Honoridez ug Mendoza pareho sab miamot og double figures.

Puntos matag usa:

AMBL (120)— Sampelo 28, Toring 14, Magan 14, Abasolo 14, Lim 12, abellana 11, Alesna 8, Sausa 8, Arias 4, Sumalinog 3, Salacut 2, Navarro 2

Tuesday Club (98)— Bacalso 20, Oretga 15, Honoridez 14, Mendoza 11, Gurrea 8, Murillo 7, Cenabre 6, Wagwag 6, Lawas 6, Jayme 5 (BANAT)