Lady Stags, Lady Falcons nanalo sa quarterfinals ng Shakey's V-League
MANILA, Philippines - Mula sa kanilang ikalawang kabiguan noong Linggo, muling nagpakita ng kanilang tikas ang San Sebastian- Excelroof nang padapain ang National University, 25-15, 25-12, 24-26, 25-13, sa quarterfinal round ng Shakey's V-League Season 7 second conference kahapon sa The Arena sa San Juan.
Sa ikalawang laro, tinalo ng Adamson University ang Far Eastern University, 25-23, 25-17, 22-25, 25-17.
Nagpasabog si Thai import Jaroensri Bualee ng 30 points para sa Lady Stags kasunod ang 16 ni guest player Suzanne Roces at pinagsamang 21 nina Elaine Cruz at Joy Benito.
Pinangunahan naman nina team captain Mervic Mangui at Din Din Santiago ang Lady Bulldogs mula sa kanilang 19 at 15 points, ayon sa pagkakasunod.
Muling sumampa ang San Sebastian sa unahan ng standing sa kanilang 7-2 win-loss slate.
Sa unang dalawang sets, nalimitahan ng Lady Stags ang Lady Bulldogs sa 27 points, ngunit nagawang makabangon ng huli sa ikatlong set sa pagbibida nina Santiago at ni Mangui.
Subalit sinagot naman ito nina Bualee, Roces at Benito sa fourth set para selyuhan ang kanilang tagumpay.
- Latest
- Trending
