Nietes hataga'g pasidungog sa dakbayan sa Mandaue

CEBU, Philippines - Usa ka engrandeng heros welcome ang giandam karon sa kagamhanan sa siyudad sa Mandaue aron ilang isugat ni WBO minimumweight champion Donnie 'Ahas' Nietes, kinsa gikatakdang moabot dinhi sa Sugbu karong Biyernes.

Bisan tuod og taga-Bacolod City, giisip na usab ni Nietes ang iyang kaugalingon nga usa ka Mandauehanon tungod kay taas nga panahon na usab nga nanimuyo siya diha sa Canduman, diin iyang kasilingan si Z 'The Dream' Gorres.

Atol sa sesyon kagahapon, si Mandaue city councilor Bethoven Andaya nagkanayon nga usa ka pasidungog ang ilang ihatag ngadto ni Nietes atol sa kasaulogan sa Charter Day sa Mandaue karong Agosto 30.

Sa iyang bahin, si Vice Mayor Glenn Bercede, kinsa mao usab ang pangulo sa committee on sports sa siyudad, mipahibalo nga usa ka proposal ang iyang ipadangat ngadto ni Mayor Jonas Cortes aron hatagan og cash incentive si Nietes isip pahalipay sa iyang malampusong fourth title defense batok ni Mario Rodriguez niadtong Domingo didto sa Mexico.

Sa laing bahin, gawas sa pagdayeg, pipila usab ka suhestiyon gikan sa mga boxing enthusiasts ang mitumaw karon. Lakip na niini ang ideya sa pagsaka ni Nietes sa mas bug-at nga light flyweight division aron sangkaon si undefeated Puerto Rican Ivan Calderon. – BANAT NEWS