Glamour Run gitakda

CEBU, Philippines - Isip tampo sa grabeng paglambo sa running dinhi sa Sugbu, ang St. Theresa’s College (STC) Batch ’87 mopasiugda og STC Glamour Run karong Septiyembre 19 diha sa The Terraces sa Ayala Center-Cebu.

Ang lumba gibuak sa upat ka kategoriya -- 10K, 5K, 3K ug 1.6 K run.

Kini ang unang higayon nga adunay 1.6K nga daganon ang mga fun runners ug beginners.

“With the running boom, we want to be different so we are including 1.6K,” matud pa ni STC Batch ’87 chairperson of events and promotions Bikik Besavilla atol sa press conference kagahapon diha sa Yo.u Resto Bar sa Parkmall.

Alang sa mga kababayen-an nga mosalmot sa 1.6K, adunay ibutang nga “retouch area” tapad sa matag water stations aron pabiling maanyag ang mga partisipante human sa lumba.

Ang Glamour Run magsilbe usab nga fund-raising program alang sa beneficiary sa STC nga Antonia de Oviedo Center’s educational services.

Niadtong mga interesadong mosalmot, ang registration fee nagkantidad og P250 lakip na niini ang singlet, race packet ug snacks. Ang registration form mahimong makakuha sa RUNNR sa Ayala, Cebu City Sports Center ug Nike Athletic Club sa Banilad Town Center.

Kini ang ikaduhang lumba nga gitukod sa STC karong tuiga human sa 2nd M.O.V.E with A.I.R Run diha sa STC Grounds.  – BANAT NEWS

Show comments