Kharoz nagmangtas sa overtime

CEBU, Philippines - Makalipong nga 23-13 rally sud lang sa singko ang gilusad sa Kharoz aron pagpukan sa Viking Haulers sa overtime, 86-76 sa 2nd season sa F. Llamas Youth Association (FYA) basketball tournament niadtong Martes sa gabii diha sa Vicente Sotto Memorial Gym sa Brgy. Punta Princesa, ning dakbayan.

Sila si Jayme Atuel ug Bambam Cabanday nagkumboya atol sa overtime alang sa Kharoz aron mohakot og 20 ug 16 puntos, apan si Chissar Llegunas maoy nangu sa opensa sa iyang 22 puntos.

Natapos ang regulasyon sa iskor, 63-all, apan sa dihang   nagmangtas ang Kharoz, kalit lang usab nga namugnaw ang Viking kansang depensa naguba nga nakahatag og pabor sa kontra nga makapabuhagay og mga puntos.

Ang duha ka koponan pareho karong nagkupot og 2-1 nga baraha.

Ang Viking gipangulohan sa tandem nilang Baeng Medalle ug Almarc Albarracin uban ang 14 puntos matag usa.

 Sa sayo pa, ang Park 'N Go Bakeshop nilansang sa ilang unang dapit sud sa tulo ka duwa pinaagi sa pagdemolis sa Leo & Rolly, 82-69.

Si Dexter Caballero mihipos og 23 puntos alang sa Park ‘N Go. Ang Leo & Rolly gipangulohan sab ni Royce Sonsona sa iyang 20 puntos, gisundan ni Bornong Endrina nga adunay 15 puntos. 

 Ang FYA gipaluyohan nilang tournament director Boogie Atillo ug ni barangay councilor Ray Gabriel Salgado.

Puntos Matag Usa

Unang duwa:

Park ‘N Go (82) - Caballero 23, Tolentino 14, Rama 13, Lopez 10, Reubal 9, Osorio 4, Anog 3, Villorden 2, Lanojan 2, Medalle 2

Leo & Rolly (69) - Sonsona 20, B. Endrina 15, Banzon 7, Abella 6, Jabonero 5, Ylanan 4, Endrina 4, Tundag 3, Marata 3

Ikaduhang duwa:

Kharoz (86) - Llegunas 22, Atuel 20, Cabanday 16, Arias 14, Dacayana 6, Macachor 3, Quita 3, Dela Cerna 3

Viking (76) - Medalle 14, Albarracin 14, Cabigas 11, Limbaga 11, Cansiko 10, Cal 6, Matillan 2, Sabalande 2, Cabanes 2. – BANAT NEWS