CEBU, Philippines - Ang Reyna sa running scene sa Cebu nga si Mary Grace Delos Santos mao na karon ang bag-ong record holder isip labing paspas nga Pinay sa 25k marathon kini human niya gidominahan ang Pilipinas 25k international marathon kagahapon didto sa Asia Town I.T Park.
Ang lumad nga taga-Zamboanga City nga si Delos Santos hinay-hinay karon nga nailhan dili lang isip usa sa atong mga top local female runners,apan usa usab ka international marathoner human niya gisakmit ang ikaduhang dapit sa Kuala Lumpur Marathon.
Kagahapon, si Delos Santos mikulit og record nga 1:41.15 sa 25k women’s division bisan pa sa presensiya sa iyang mga kaatbang. Ang rising teen runner nga si Mary Joy Tabal sa Southwestern University (SWU) maoy second placer sa oras nga 1:49.17, samtang ang Kenyan nga si Ireine Kipchumba maoy third placer sa oras nga 1:58.11.
Hinuon, namawi ang mga Kenyan runners sa men’s 25k run, dihang ilang gisakmit ang unang duha ka pwesto kortesiya nila ni Anthony Cusque isip kampiyon sa oras nga 1:27.43 ug Abraham Missos sa oras nga 1:28.59, bugtong Pinoy nga nakasulod sa top three mao si Ian Bernido sa oras nga 1:31.30. (BANAT NEWS)