Losiaboi, Carter nanghawud sa 5th CDU Run

CEBU, Philippines - Pabilin ang trono ni Kenyan Simon Losiaboi isip hari sa 10k men’s division, samtang gibayaw nga bag-ong reyna sa women’s division si Madelyn Carter sa 5th CDU Run kagahapon didto sa CDU grounds, North Reclamation area, syudad sa Mandaue.

Bisan paman og bag-o pa siya mipaubos sa usa ka minor eye surgery, wala gihapon kini makapugong ni Losiaboi sa pagsakmit sa titulo sa men’s open sa oras nga 32:15.606, gisundan nila ni Arnold Unabia (33:13.096) ug Albert Busa (33:13.096).

Sa iyang bahin, si Carter milabang sa finish line sa oras 39:45.282, samtang si Jojielyn Pepito (40:32.780) ug Aiza Suaybaguio (42:00.984) maoy misakmit sa ikaduha og ikatulong dapit. Ang kanhi sikat nga aktres ug singer nga si Donna Cruz-Larrazabal misulod usab sa top 8 sa oras nga 50:06.641.

Ang beteranong si Reprinel Banzon maoy mananaug sa 5k men’s sa oras nga 15:53.830, gisundan ni Michael Torres (16:30.870) ug Miljone Luterte (17:08.710) isip second ug third placer.

Nanghawud sa 5k women’s si Jolly Rose Maxilom sa oras nga 20:22.030, samtang sila si Merlyn Alin (20:41.270) ug Christy Alin (20:43.900) maoy mikompleto sa top three finisher.

Gawas sa mga runner, naglangkub usab sa kapin 3,000 ka mga runners nga misalmot mao ang mga medical personnel ug tinun-an sa Cebu Doctors University. (BANAT NEWS)