Lady Bulldogs humabol sa quarters
MANILA, Philippines - Mula sa 0-2 pagkakalugmok sa unang dalawang sets, bumangon ang National University sa huling tatlong sets upang sikwatin ang huling upuan para sa quarterfinals.
Nilaglag ng Lady Bulldogs ang Perpetual Help, 12-25, 14-25, 25-23, 25-18 at 15-13 upang mapabilang sa anim na koponan na makakasama sa susunod na bahagi ng ikalawang conference ng Shakey’s V-Leauge Season 7 kahapon sa The Arena sa San Juan.
Pinagbidahan ni mainstay Mervic Mangui ang impresibong pagbabalik ng Sampaloc-based spikers sa kanyang kinamadang 28 points habang nag-ambag ng 15 si Maricar Nepomuceno at may sampu si guest player Din Din Santiago.
Nanguna naman para sa mga taga-Las Piñas si Sandra Delos Santos sa kanyang tinipang 18 puntos at nagdagdag naman si Ronerry Dela Cruz ng 14 at may 12 si April Sartin.
Matapos kunin ng Lady Altas ang unang dalawang sets, sumandig ang Lady Bulldogs kina Mangui, Santiago at Nepomuceno upang makabangon sa huling tatlong sets ng labanang tumagal ng isang oras at 50 minuto.
- Latest
- Trending
