LLBA Rollway Cup finals kumbatihan karon

CEBU, Philippines - Magsambunot na ang managkaribal i3R-Cavs ug Solmeat alang sa korona sa LLBA Rollway Cup 2010 basketball tournament karong gabii diha sa Villas Magallanes gym sa dakbayan sa Lapu-Lapu.

Ang i3R-Cavs ug ang Solmeat magsangka sa alas-8 sa gabii human sa engkuwentro tali sa Ave Maria Sanctuary Park ug Ace Penzionne nga mag-ilog alang sa ikatulong dapit sa alas-7 sa gabii.

Motimon sa 13R-Cavs nilang Dandan Ramos ug Michael Ouano mao sila si Archie Ompad, Jimboy Igot, Armand Lamoste ug Eddie Bontes. Sa habig sa Solmeat ni team owner Sol Bascon pagatimonan ni Alan Larazaga, kinsa mao sab ang nangulo sa ilang pagpalagpot sa Ave Maria. Maglaum sab siya sa suporta sa ubang sinaligan sa Solmeat sama nila ni Diego Tampus, Kakay Versoza, Uriel Manilag ug Matt Casio.

Sa laing bahin, ang Ave Maria ni Raffy Senining magsalig sa abilidad nilang Ronron Aying, Dindo dela Rama, Glenn Aying ug Ondo Cadungog, samtang ang Ace Penzionne ni Tony Amistad maghangad sa tandem nilang Buldog Ybañez ug Darwin Pangatungan.

Ang LLBA Rollway Cup 2010 gipaluyohan sab sa Rollway Customs Brokerage ni Rolly dela Pieza, D' House of Sports ni Billy Nadado, Comfa General Merchandise ni Ely Gomoz ug AJY Bong ni Alan Yu. – BANAT NEWS