Dr. Mancao mopahigayon og libreng running seminar

CEBU, Philippines - Sa dili pa ang ginukdanay sa 5th CDU University Run karong Domingo, ipaubos una ang mga partisipante sa usa ka libreng running seminar nga ipahigayon karong alas-3 sa hapon diha sa Cebu Doctors' University (CDU) campus sa Mandaue City.

Pinangulohan ni running heart surgeon Dr. Peter Mancao, ang maong seminar mohatag og tips ug mga pahimangno ilabi na sa mga bag-ong sulbong runners aron mamahimong luwas ug malampuson ang ilang pagdagan karong Domingo.

Sa pagka karon, kapin na sa 2,000 ka running enthusiasts ang mikompirmar sa ilang partisipasyon sa ikalimang tuig sa labing dakung University Run sa Sugbu nga gipasiugdahan ni Dr. Yong Larrazabal sa Run for Sight Foundation.

Gawas sa running lecture, usa usab ka dance contest ang mahitabo nga salmotan sa tulo ka running clubs sama sa Ungo sa Dagan, Run Belly Run ug Guardo Dancers.   – BANAT NEWS