Webmasters milubong sa Cobras

CEBU, Philippines - Gigamit ni June Mar Fajardo ang iyang bentaha sa gitas-on ug iyang gipugos ngadto sa foul trouble ang iyang mga defenders aron pangulohan ang University of Cebu (UC) Webmasters ngadto sa impresibong kadaugan batok sa Southwestern University (SWU) Cobras, 82-66 sa 10th   Cebu Schools Athletic Foundation, Inc. (CESAFI) basketball event niadtong Domingo diha sa Cebu Coliseum.

Sa sayo pa, gipakuratan sa Don Bosco Technology Center (DBTC) Greywolves ang higpit nilang karibal University of Southern Philippines Foundation (USPF) Panthers human sila mo-iskor og 76-67 nga come-from-behind nga kadaugan aron pahamtangan ang ilang biktima sa ikatulong sunod-sunod nga pilde. Naglisud pa si Fajardo pag-adjust sa depensa nga gipahamtang kaniya gikan sa Cobras ilabi ni Rene Pacquiao hinungdan nga kuwatro puntos lang ang nahimo niya sa first period.

Sa dihang gipasulod na ni coach Roel Gomez ang iyang second stringers aron makapahuway si Fajardo, ang mga sophomores na nga sila si Gerald Ampoon ug John Philipp Vincent delos Santos ang nangu sa opensiba ug ilang nasakmit ang labaw sa halftime, 39-35.

Mangtas na nga mibalik si Fajardo sa third quarter ug gikan niadto, gidabodabohan na sa UC ang Cobras sa mosunod nga duha ka kuwarters. Gawas nga na-foul trouble si Pacquiao, wala nay laing players sa Cobras nga nakapiog ni Fajardo, ilabi na kay ang laing duha ka higante nga sila si Clifford Maguate ug Ritchie Jalandoni wala makaduwa.

Gipasakay ni Fajardo sa iyang tag-as nga kasway ang   Cobras nga midutdot kaniya ug maoy nangu sa opensa pinaagi sa iyang 21 puntos.

Ang Webmasters nagsawo karon sa liderato uban sa University of the Visayas (UV) Green Lancers sa managsamang 2-0 win-loss records.

Tungod kay wala kapugngi si Fajardo sa ilawom, dali kaayong nabiyaan ang Cobras ug nagbitay na ang iskor niini ngadto sa 23 puntos, 81-58.

Nakatabang sab si Edward Pao kinsa miposa og 12 puntos, samtang si Ampoon kinsa maayong nakaduwa sa second quarter, midugang og 11 puntos.

Daku sab og natabang ang mga guwardiya nga sila si Quinton Brian Heruela, Luigi Bercede ug Kelvin Juliane sa opensiba sa Webmasters

Si Pacquaio, kinsa mipakita og maanindot nga jumpshots batok ni Fajardo sa sayong bahin sa duwa, maoy nangu sa Cobras sa iyang 14 puntos, ang beteranong guwardiya nga si Aard Diango miamot og 11 puntos.

Sa laing duwa, si Clarito Hernando Jr. maoy nangu sa Greywolves sa iyang 15 puntos, samtang sila si Jan Pons Geraga ug Archie Cortes parehong mihakot og 12 puntos,

Ang Panthers, kinsa mihagsa ngadto sa 0-3 nga baraha, gipangulohan ni Dennis Earvin Ferraren pinaagi sa iyang 17, gisundan ni   Christian Tinoy nga adunay 13 puntos. (BANAT)